ആദ്യമായ് കാനേഷുമാരിക്കാര്‍ കണക്കെടുക്കാന്‍ വന്നപ്പോള്‍,
ഞാന്‍ സന്തോഷങ്ങളുടെ കോടികളുള്ളവരില്‍
ഒരാളായിരുന്നു;
അന്നു ഞാന്‍ കുട്ടികളുടെ ലിസ്റ്റില്‍,
രണ്ടാമതവര്‍ വന്നപ്പോള്‍,
ഞാന്‍ സ്വപ്നങ്ങളുടെ ലക്ഷങ്ങളുള്ളവരില്‍
ഒരുവളായി;
കൗമാരക്കാരുടെ ലിസ്റ്റില്‍.
മൂന്നാമതവര്‍ വന്നപ്പോള്‍,
ഞാന്‍ യാഥാര്‍ത്ഥ്യങ്ങളുടെ ആയിരങ്ങളുള്ളവരില്‍
ഒരുവളായി;
യവ്വനയുക്തരായ സ്ത്രീകളുടെ ലിസ്റ്റില്‍.
നാലാമതവള്‍ വരുമ്പോള്‍,
എനിക്കറിയില്ല-
ഞാന്‍ സന്തോഷങ്ങള്‍ ഉള്ളവരുടേയോ
അല്ലെങ്കില്‍,
കയ്പുനീരി കുടിക്കുന്നവരുടേയോ ആയ
നൂറുകളില്‍ ഒരുവളായേക്കാം.
ജ്വലിച്ചു തീരുന്ന നിറമുള്ള സ്വപ്നങ്ങളെ നോക്കി,
നെടുവീര്‍പ്പിടുന്നവരുടെ ലിസ്റ്റില്‍.
അഞ്ചാമതവര്‍ വരുമ്പോള്‍,
തീര്‍ച്ചയായും പത്തു ദു:ഖങ്ങളെങ്കിലും
ഉള്ളവരില്‍ ഒരാളായിരിക്കും;
വൃദ്ധാവസ്ഥയുടെ ഇടറുന്ന കാലടിക്കാരുടെ ലിസ്റ്റില്‍.
ആറാമതവര്‍ വരുമ്പോള്‍
ഒറ്റപ്പെട്ടവരുടെ ഒറ്റ ലിസ്റ്റിലാവും
ഇനിയും ഒന്നും ബാക്കിവേണ്ടാത്തവരുടെ
ഒറ്റകളില്‍ ഒരുവളായി.....................
********************
***********
ലീല ഉപാദ്ധ്യായ
**************
6 comments:
യഥാർഥങ്ങളിലെയ്ക്ക് മനസ്സിനെ തുറന്നിടുന്ന വരികൾ
നന്നായിരിക്കുന്നു
വല്ലപ്പോഴും മാത്രമാണ് ഇത്ര നല്ല വരികൾ വായിക്കാനാവുക.
****
മനോഹരമായ കവിത. അന്ന്‌ ജനകീയകവിതാവേദിയുടെ ഒത്തുചേരലില്‍ ഈണത്തിലുള്ള കവിതകളാണ്‌ കൂടുതല്‍ വഴങ്ങുന്നത്‌ എന്ന്‌ പറഞ്ഞത്‌ തിരിച്ചെടുക്കുന്നു. ആശംസകള്‍.
ആദ്യമായാണല്ലേ ഈ വഴിക്ക്‌?അസ്സലായിരിക്കുന്നു.
പ്രിയ കവെ ഇത്തരം എഴുത്തുകള്‍ ഇനിയുമുണ്ടാവട്ടെ
സസ്നേഹം
മനസ്സില്‍ തട്ടി.ആശംസകള്‍
Post a Comment