കാത്ത് - [പ്രദീപ്കുമാറിന്]

പേരറിയാത്ത ഒരു നിലവിളി
മോര്‍ച്ചറിയിലെത്തി.
സൂക്ഷിപ്പുകാരന്‍ പറഞ്ഞു;
'നിലവിളിക്ക് ഇവിടെ
കിടക്കയില്ല.
മോര്‍ച്ചറിയില്‍ കിടക്കാന്‍
കുറഞ്ഞത് പേരെങ്കിലും വേണം
ഒരു ശരീരമെങ്കിലും '.
പേരില്ലാത്ത നിലവിളി
ഒരു ശരീരമന്വോഷിച്ച്
ശ്മശാനത്തിലെത്തി.
പാറാവുകാരന്‍ പറഞ്ഞു;
'നിലവിളിക്ക് ഇവിടെ
ചിതയില്ല .
ചിതയില്‍ കിടക്കാന്‍ ഒരു
മരണപത്രം വേണം.
ഒരു മോര്‍ച്ചറി രസീതെങ്കിലും.
കുറഞ്ഞതൊരു സാക്ഷിയെങ്കിലും.'
മോര്‍ച്ചറിയിലെത്താനുള്ള
മാര്‍ഗമന്വോഷിച്ച്
നിലവിളി റയില്‍ട്രാക്കില്‍
ജീവിതം കാത്തുകിടന്നു !
*********













*****************
വി. ജയദേവ്.
*************